Икътисад фәннәре кандидаты, Россия Хөкүмәте каршындагы Финанс университеты доценты Панина фикеренчә, 100 мең сумга кадәр булган тупланмаларны тупланма счетта саклау иң кулай вариант.

Белгеч аңлатуынча, мондый счёт акчага теләсә кайсы вакытта ирекле керү мөмкинлеге бирә. Шул ук вакытта тупланмаларга процентлар да исәпләнә, ягъни акча эшләп тора.

Ә инде 1,4 миллион сумга кадәр булган сумманы ышанычлы банктагы кертемгә урнаштыру киңәш ителә. Бу акчаны сакларга һәм тотрыклы керем алырга ярдәм итә.

Зуррак тупланмалар исә бер генә кертемдә түгел, ә төрле сроклы һәм төрле процентлы берничә кертемгә бүленергә тиеш. Белгеч сүзләренчә, бу алым акчаны куркынычлардан сакларга һәм кирәк чакта аның бер өлешен генә файдалану мөмкинлеген бирә.

Панина шулай ук кертем белән тупланма счёт арасындагы аерманы да искәртә. Кертемдә процент ставкасы, гадәттә, билгеле бер вакытка беркетелә, әмма акчаны вакытыннан алда алсаң, процентлар югалырга мөмкин. Ә тупланма счёт күпкә сыгылмалырак: аны тулыландырырга да, акча алырга да мөмкин. Әмма мондый счетларда процент ставкасын банк үзгәртә ала.

Икътисадчының төп киңәше гади: «Барлык акчаны да бер урынга гына куймагыз». Аның фикеренчә, тупланмаларны озак, урта һәм кыска сроклы финанс кораллары арасында бүлү иң дөрес карар булып санала. Бу очракта акча да саклана, керем алу мөмкинлеге дә арта.