Чаллыда Мәләкәс аръягы 21нче микрорайонындагы спорт мәйданчыгында 6 яшьлек кыз имгәнде.

Аны аңсыз килеш, 2 мартта махсус техника белән республиканың балалар клиник хастаханәсенә озаттылар.

ДРКБның матбугат хезмәте хәбәр итүенчә, баланың хәле тотрыклы авыр. Аны ИВЛ аппаратына тоташтырганнар. Барлык кирәкле медицина ярдәме күрсәтелә.

Баланың имгәнү факты буенча РФ Җинаятьләр кодексының 238 нче «Куркынычсызлык таләпләренә җавап бирми торган эшләр башкару яисә хезмәт күрсәтү» маддәсе буенча җинаять эше кузгатылды.

Бу эшне РФ Тикшерү комитеты рәисе Александр Бастрыкин контрольгә алды.